Saal bhar humne poori masti ki,
College regular gaye, par classes bunk ki.
Baithe rahe yaaron ke saath canteen mein,
Socha padhai ka kya hai, kar lenge baad mein.
Aaya minor heart-attack ka roop lekar,
Mid-term jo likha agal-bagal dekhkar.
Kuch hi dino ke baad aaya pre-final,
Tab realize hua kitna wakt gaya hai nikal.
Ghar jaakar bhagwan ka naam liya,
Aur notes dhoondne ka kaam start kiya.
Yaad aaya class toh gaye nahi kabhi,
Toh bhai notes kahan se aayenge abhi!
Anatarmann se ek dheemi si awaaz nikli,
“Gadhede, nikaal woh books jo college ne di thi!”
Cupboard khola aur books par nazar daudaayi,
Haalat dekh unki naani aur par-naani yaad aayi.
Unn kitabon par aur mere bheje par,
Dhool jami hui thi ek baraabar.
Khair, jhaad foonk kar ek kitaab kholi,
Uss kitaab ne in-turn meri aankhein kholi.
Ek pal ke liye toh dil ne chaha,
Suicide kar, khatm kar dun kissa saara.
But then socha ek chance le lete hain,
Khud se padhne ke ek koshish kar lete hain.
Tabhi bhagwan ki daya drishti mujhpar padi,
Aur dimag mein mere ek bright batti jali.
Cell utha kar ek friend ko phone lagaya,
Aur bola-“Tu ready ho, main abhi aaya!”
Bike nikaali aur chal pade dhoope mein,
Socha friend ke saath baith kar padhai kar lein.
Fakr ho raha tha mujhe apne idea par,
Ye idea aaya mere life mein naya rang lekar.
Har roz ek friend ko target banaya,
Saath baith unke kuch kuch samajh paaya.
Ullu ki tarah raat-raat bhar jaag kar,
Subjects cover kiye maine ek-ek kar.
Zindagi meri pareshaan aatma ki tarah,
Raat din bhool bhatak rahi thi jagah-jagah.
Dhoop ne bana diya hans se kauwa mujhe,
Ab toh dost bhi pehchaanne se inkaar karne lage.
Raat bhar jaag kar jab hum din mein soye,
Sapno mein bhi theorems aur formula nazar aaye.
Apni har baat ke liye ek lamba proof deta,
To dost kehte-“Tera dimag fir gaya hai beta!”
Par aaj mere dil mein poori shaanti chaayi hai,
Kyunki meri pal-pal ki mehnat rang laayi hai,
Exam likhne ka baad dil ko ek satisfaction hua,
Mehnat kabhi bekar nahi jaati, ye realization hua.
Thanks to all my body parts and specially brain,
For helping me though I troubled you again and again.
Yaar-doston ka yogdaan bhi tha bahot bada,
But my most sincere thanks to you, O Khuda!!!